மன்னார் நானாட்டான் ஸ்ரீசெல்வமுத்துமாரியம்மன் ஆலயத்தின் ஸ்தல வரலாறு-மறோட்சவ சிறப்பு வெளியீடு

மன்னார் நானாட்டான் ஸ்ரீசெல்வமுத்துமாரியம்மன் ஆலயத்தின் ஸ்தல வரலாறு-மறோட்சவ சிறப்பு வெளியீடு

மன்னார் மாவட்டத்தின் வரலாற்றுப் புகழ்பெற்ற நானாட்டான் பிரதேசத்தில் வீற்றிருந்து அருள்பாலிக்கும் அகோர விகார மகாமாரி ஸ்ரீ செல்வமுத்து மாரியம்மன் ஆலயத்தின் வருடாந்த மஹோற்சவத் திருவிழா எதிர்வரும் 05-08-2024 அன்று பக்திபூர்வமாக ஆரம்பமாக உள்ளது. ஒரு மூர்த்தத்தில் மூன்று சக்திகளைக் கொண்ட இந்த அம்பிகையின் வரலாறு, மன்னார் மண்ணின் தொன்மையையும் ஆன்மீகச் செழுமையையும் பறைசாற்றுகிறது. 

தமிழ் வியூகம் ஆசிரியர் பீடம், 

1. அகோர விகார மகாமாரி: 109-வது சக்தி பீடம்

உலகெங்கிலும் உள்ள இந்துக்கள் 108 சக்தி பீடங்களை வழிபடுவது வழக்கம். ஆனால், வரலாற்று ஆய்வுகளின் படி, 109-வது சக்தி பீடமாக நானாட்டான் ஸ்ரீ செல்வமுத்து மாரியம்மன் போற்றப்படுகிறாள்.

• பூர்வீக வரலாறு: முன்னொரு காலத்தில் பாண்டிய மன்னர்களின் தலைநகராக விளங்கிய இராசமடு பகுதியில், அரண்மனைச் சூழலில் 'அகோர விகார மகாமாரி' என்ற பெயரில் அம்பிகை வீற்றிருந்தாள். அல்லிராணி ஆட்சியின் தலைநகராகவும் இப்பிரதேசம் விளங்கியது குறிப்பிடத்தக்கது.

• பாதுகாக்கப்பட்ட விக்கிரகம்: அந்நியர் ஆதிக்கத்தின் போது விக்கிரகங்களுக்கு ஆபத்து நேராத வண்ணம், 'சிறி கணபதி' என்பவர் அம்பிகையின் சிலையைப் பாதுகாத்து, தற்போது ஆலயம் அமைந்துள்ள நானாட்டான் பகுதிக்குக் கொண்டு வந்து நிலவறைக்குள் மறைத்து வைத்தார். அந்த இடத்திலேயே இன்று ஆலயம் கம்பீரமாக எழுந்து நிற்கிறது.

2. வியாய மரத்தடியில் தோன்றிய அம்பிகை

19-ம் நூற்றாண்டின் ஆரம்பத்தில், தற்போது அம்பாள் வீற்றிருக்கும் இடத்திற்கு அருகில் இருந்த வியாய மரத்தடியில் ஒரு சிறிய கருங்கல்லை வைத்து அடியவர்கள் வழிபட்டு வந்தனர். நாகப்பாம்பின் நடமாட்டத்தைக் கண்ட மக்கள், அவ்விடத்தைத் துப்பரவு செய்து சூலாயுதம் ஏந்தி வழிபடத் தொடங்கினர். 1958-65 காலப்பகுதியில் ஏற்பட்ட வெள்ளப்பெருக்கினால் அந்த மரம் விழுந்தாலும், அம்பிகையின் அருள் குறையாமல் வளர்ந்து கொண்டே இருந்தது.

திருக்கேதீஸ்வர ஆலயத்தில் அன்னபூரணி கலாசார மண்டபம் திறப்பு ஆன்மீகப் பணிகளில் மற்றுமொரு மைல்கல்

3. ஆலயத்தின் எழுச்சியும் கும்பாபிஷேகமும்

1942-ல் முதன்முதலில் ஆலயம் அமைக்க எடுக்கப்பட்ட முயற்சி தோல்வியுற்றாலும், 1951-ல் 'நானாட்டான் சைவ மகா சபை' உருவாக்கப்பட்டு முறையாகக் காணி பெறப்பட்டது.

• முதல் கும்பாபிஷேகம்: 27-06-1968 அன்று ஆகம விதிப்படி பிரம்மாண்டமான கும்பாபிஷேகம் நடைபெற்றது.

• மஹோற்சவ ஆரம்பம்: 1982-ல் முதலாவது மஹோற்சவம் நடைபெற்றது. திருக்கேதீஸ்வரத்தில் இருந்து கொடிச்சீலை ஊர்வலமாக எடுத்து வரப்பட்டு திருவிழா களைகட்டியது.

4. யுத்த வடுக்களும் மீள் உருவாக்கமும்

1983 மற்றும் 1990-களில் ஏற்பட்ட இனக்கலவரம் மற்றும் யுத்தச் சூழலால் ஆலயம் முற்றாகச் சேதமடைந்தது. மக்கள் இடம்பெயர்ந்ததால் 45 நாட்கள் பூசையின்றி ஆலயம் பூட்டப்பட்டிருந்தது. எனினும், 1990-களின் இறுதியில் மீண்டும் குடியேறிய மக்கள், பெரும் சிரமங்களுக்கு மத்தியில் ஆலயத்தைப் புனரமைத்தனர். 30-08-2001 அன்று மீண்டும் மகா கும்பாபிஷேகம் சிறப்பாக நடைபெற்றது.

5. பஞ்சதள இராஜகோபுரம் மற்றும் மஹோற்சவ சிறப்புகள்

தற்போது அம்பிகைக்கு பஞ்சதள இராஜகோபுரம் அமைக்கும் பணிகள் பொருளாதார நெருக்கடிகளுக்கு மத்தியிலும் மிகவும் நேர்த்தியாக நடைபெற்று வருகின்றன.

• பால் செம்பு காவடி: இராசமடு சாளம்பன் பிள்ளையார் ஆலயத்திலிருந்து பக்திபூர்வமாக எடுத்து வரப்படும்.

• வேட்டைத் திருவிழா: ஆண்டார் செட்டிவெளி முனியப்பர் ஆலயத்தில் மிகச் சிறப்பாக நடைபெறும்.

அகோர விகார மகாமாரி அன்னை, தன்னை நாடி வரும் பக்தர்களின் குறைகளைத் தீர்க்கும் கண்கண்ட தெய்வமாக விளங்குகிறாள். எதிர்வரும் ஆகஸ்ட் 5-ம் திகதி ஆரம்பமாகவுள்ள மஹோற்சவத்தில் கலந்துகொண்டு, 109-வது சக்தி பீடத்து அன்னையின் அருளைப் பெற அனைத்து அடியவர்களையும் அன்புடன் அழைக்கின்றோம்.

தொகுப்பு: ஆலய வரலாற்றுச் சம்பவத் திரட்டு ஆதாரங்களுடன் ஜெகன் ஊடகவியலாளர்

@tamilviyugam