மன்னார் நகர் பகுதி பாடசாலைகளின் சுகாதார துறையினர் அதிரடி நடிவடிக்கை

மன்னார் நகர் பகுதி பாடசாலைகளின் சுகாதார துறையினர் அதிரடி நடிவடிக்கை

மன்னார் நகர் பகுதியில் உள்ள பாடசாலைகளின் சுகாதார நிலை குறித்து பொதுமக்களிடமிருந்து கிடைக்கப்பெற்ற தொடர்ச்சியான எழுத்துமூல முறைப்பாடுகளை அடுத்து, மன்னார் பொதுச் சுகாதார வைத்திய அதிகாரி பணிமனையினரால் விசேட சுற்றிவளைப்பு நடவடிக்கை ஒன்று மேற்கொள்ளப்பட்டது.

தமிழ் வியூகம் மன்னார் செய்தியாளர்,    

 பாடசாலைகளில் கண்டறியப்பட்ட அதிர்ச்சியூட்டும் உண்மைகள்

மன்னார் பொதுச் சுகாதார வைத்திய அதிகாரி ரூபன் லெம்பேட் அவர்களின் ஆலோசனையின் பேரில், தலைமைப் பொதுச் சுகாதாரப் பரிசோதகர் தலைமையிலான குழுவினர் கடந்த திங்கட்கிழமை (9) மேற்கொண்ட ஆய்வின் போது, பாடசாலை ஒன்றில் பின்வரும் பாரிய குறைபாடுகள் கண்டறியப்பட்டன:

• மலசலகூட பராமரிப்பின்மை: மாணவ, மாணவிகள் பயன்படுத்தும் மலசலகூடங்கள் சுத்தமற்ற முறையிலும், பல கழிவறைகள் பயன்படுத்த முடியாத நிலையிலும் காணப்பட்டன.

• சுகாதாரமற்ற உணவுகள்: பாடசாலைச் சிற்றுண்டிச் சாலையில் உணவுகள் சுகாதாரமற்ற முறையில் கையாளப்பட்டதோடு, மாணவர்களுக்கு வழங்கப்படும் இலவச உணவு தயாரிக்கப்படும் பகுதி மிகவும் அசுத்தமாகக் காணப்பட்டது.

• டெங்கு அபாயம்: கழிவுநீர் வெளியேற முறையான வசதிகள் இன்மையால், டெங்கு நுளம்புகள் பெருகும் அபாயகரமான சூழல் நிலவியது.

மீண்டும் மன்னார் கடற்கரையோரங்களில் கரையொதுங்கும் பிளாஸ்டிக் துகல்கள்.

• சுற்றுச்சூழல் பாதிப்பு: பாடசாலை வளாகத்தில் கழுதை, நாய் போன்ற விலங்குகளின் நடமாட்டம் காணப்பட்டதோடு, பொலித்தீன் மற்றும் குப்பைகள் முறையாக அகற்றப்படாமல் கிடந்தன.

• பாதுகாப்பற்ற உபகரணங்கள்: மாணவர்களுக்கு ஆபத்தை விளைவிக்கக்கூடிய துருப்பிடித்த உலோகங்கள், கட்டிட இடிபாடுகள் மற்றும் மணல் திட்டுகள் ஆங்காங்கே காணப்பட்டன.

சுகாதாரத் துறையினரின் அதிரடி நடவடிக்கை

இந்தக் குறைபாடுகளைக் கண்டறிந்த அதிகாரிகள், மாணவர்களின் பாதுகாப்பைக் கருத்திற்கொண்டு உடனடி நடவடிக்கைகளை மேற்கொண்டனர்:

• உணவுப் பகுதி மூடல்: தரம் குறைந்த உணவு தயாரிக்கும் பகுதி புனரமைக்கப்படும் வரை, அதனை உடனடியாக மூடி வைக்குமாறு பாடசாலை நிர்வாகத்திற்கு உத்தரவிடப்பட்டது.

• கடுமையான எச்சரிக்கை: இனங்காணப்பட்ட ஆபத்தான பொருட்கள் மற்றும் குப்பைகளை உடனடியாக அகற்றுமாறு நிர்வாகத்தினருக்குப் பணிப்புரை வழங்கப்பட்டது.

 பிரபல உணவகத்திற்கு 83,000 ரூபா அபராதம் மற்றும் சிறை தண்டனை

மன்னார் பகுதியில் உணவகங்களின் தரம் குறித்து சுகாதாரத் துறையினர் தொடர்ச்சியாகக் கள ஆய்வுகளை மேற்கொண்டு வருகின்றனர். இதன் ஒரு அங்கமாக, கடந்த 5 ஆம் திகதி மன்னார் நீதவான் நீதிமன்றினால் வழங்கப்பட்ட தீர்ப்பு பலரையும் கவனிக்க வைத்துள்ளது.

• தண்டனை விபரம்: மன்னாரில் உள்ள பிரபல உணவகம் ஒன்றின் முகாமையாளர் மற்றும் ஊழியர் ஒருவருக்கு ஐந்து வருடங்கள் ஒத்திவைக்கப்பட்ட சிறைத் தண்டனை விதிக்கப்பட்டது.

• அபராதம்: குறித்த உணவகத்திற்கு 83,000 ரூபா தண்டப்பணம் விதிக்கப்பட்டது. சுகாதார விதிகளை மீறிச் செயற்படும் உணவகங்களுக்கு இது ஒரு எச்சரிக்கையாக அமைந்துள்ளது.

 தொடரவுள்ள விசேட கண்காணிப்புகள்

மன்னார் மாவட்டத்திலுள்ள ஏனைய பாடசாலைகளிலும் இவ்வாறான சுகாதாரக் குறைபாடுகள் இருக்கலாம் எனக் கருதப்படுவதால், மாவட்டத்திலுள்ள அனைத்துப் பாடசாலைகளையும் உள்ளடக்கிய விசேட கண்காணிப்பு நடவடிக்கைகள் இனிவரும் நாட்களில் தொடர்ச்சியாக முன்னெடுக்கப்படும் என மன்னார் பொது வைத்திய அதிகாரிகள் பணிமனை தெரிவித்துள்ளது.

எதிர்காலத் தூண்களாக விளங்கும் மாணவர்களின் உடல்நலம் மற்றும் கல்வியில் அக்கறை செலுத்துவது ஒவ்வொரு பாடசாலை நிர்வாகத்தினதும் கடமையாகும். அதேபோல், பொதுமக்களுக்கு விநியோகிக்கப்படும் உணவுகளின் தரம் குறித்தும் வர்த்தகர்கள் மிகுந்த பொறுப்புணர்வுடன் செயற்பட வேண்டும்.

@tamilviyugam