மன்னாரில் காற்றாலைக்கு எதிரான போராட்டம் 100 வது நாள் தீப்பந்த எழுச்சி போராட்டம்.

மன்னாரில் காற்றாலைக்கு எதிரான போராட்டம் 100 வது நாள் தீப்பந்த எழுச்சி போராட்டம்.

இலங்கையின் மன்னார் தீவுப் பகுதியில் முன்னெடுக்கப்பட்டு வரும் காற்றாலை மின் கோபுரங்கள் அமைக்கும் திட்டத்திற்கு எதிராக, அப்பகுதி மக்கள் முன்னெடுத்து வரும் அறவழிப் போராட்டம் இன்று திங்கட்கிழமை (10) நூறாவது (100) நாளை எட்டியுள்ளது. இதனை முன்னிட்டு இன்று இரவு 7.30 மணியளவில் போராட்டக் குழுவினரால் எழுச்சிமிக்க 'தீப்பந்தப் போராட்டம்' முன்னெடுக்கப்பட்டது.

தமிழ் வியூகம் மன்னார் செய்தியாளர் 

100-வது நாள் தீப்பந்த எழுச்சிப் போராட்டம்

மன்னார் போராட்டக் குழுவின் ஏற்பாட்டில், அருட்தந்தை மாக்கஸ் அடிகளார் தலைமையில் இந்தப் போராட்டம் நடைபெற்றது. இதில் ஆண்கள், பெண்கள் மற்றும் போராட்டக் குழுவின் உறுப்பினர்கள் என நூற்றுக்கணக்கானோர் கையில் தீப்பந்தங்களை ஏந்தியவாறு கலந்துகொண்டனர்.

மன்னார் நகர வீதிகளின் ஊடாக அமைதியான முறையில் சென்ற போராட்டக்காரர்கள், கைகளில் எரியும் தீப்பந்தங்களுடன் தமது வாழ்வுரிமையை வலியுறுத்தி கோஷங்களை எழுப்பினர். "மக்களையும், எமது பூர்வீக வாழ்விடங்களையும், நாட்டின் இயற்கை வளங்களையும் பாதுகாத்து வருங்கால சந்ததியினரிடம் ஒப்படைப்பதே எமது நோக்கம்" என அவர்கள் இதன்போது முழக்கமிட்டனர்.

மன்னார் நறுவிலிக்குளம் மக்களின் காணி பிரச்சனைக்கு தீர்வு கிடைக்குமா?

போராட்டக்காரர்களின் 3 முக்கிய கோரிக்கைகள்

இந்தப் போராட்டத்தின் 100-வது நாளை முன்னிட்டு, அரசிடம் மூன்று காத்திரமான கோரிக்கைகளை மக்கள் முன்வைத்துள்ளனர். இந்தக் கோரிக்கைகள் நிறைவேற்றப்பட்டு, அது குறித்த எழுத்து மூலமான உறுதிமொழி கிடைக்கும் வரை போராட்டம் தொடரும் என அவர்கள் அறிவித்துள்ளனர்.

அந்த 3 கோரிக்கைகள் இதோ:

1. திட்டத்தை நிறுத்துதல்: மன்னார் தீவில் முன்னெடுக்கப்படும் 14 காற்றாலை மின் கோபுரங்கள் அமைக்கும் திட்டத்தை உடனடியாக நிறுத்தி, அதனைப் பாதிப்பில்லாத வேறு இடத்திற்கு மாற்ற வேண்டும்.

2. கனிய மணல் அகழ்வுத் தடை: மன்னார் தீவின் எந்தப் பகுதியிலும் கனிய மணல் அகழ்வு செய்வதற்கு எவ்வித அனுமதியையும் வழங்கக்கூடாது.

3. பாதிப்புகளுக்குத் தீர்வு: ஏற்கனவே அமைக்கப்பட்ட (தம்ப்பவனி மற்றும் நறுவிலிக்குளம்) இரண்டு காற்றாலை உயர் மின் உற்பத்தி திட்டங்களினால் ஏற்பட்டுள்ள சுற்றுச்சூழல் மற்றும் வாழ்வாதாரப் பாதிப்புகளுக்கு உடனடித் தீர்வு காணப்பட வேண்டும்.

 கிராமங்கள் தோறும் பரவும் போராட்டம்

தீப்பந்தப் போராட்டத்தின் இறுதியில் கருத்துத் தெரிவித்த அருட்தந்தை மாக்கஸ் அடிகளார், "இன்றைய தினம் ஆரம்பித்து வைக்கப்பட்ட இந்தத் தீப்பந்த எழுச்சிப் போராட்டம் என்பது ஒரு தொடக்கமே. நாளை முதல் இது ஒவ்வொரு கிராமங்கள் தோறும் விரிவுபடுத்தப்படும். மக்களின் விருப்பத்தை மீறி முன்னெடுக்கப்படும் எந்தவொரு திட்டத்தையும் மன்னார் மண் அனுமதிக்காது" எனத் தெரிவித்தார்.

மன்னார் தீவின் தனித்துவம் மற்றும் பாதிப்புகள்

மன்னார் தீவு என்பது உலகளாவிய ரீதியில் பறவைகள் வலசை வரும் முக்கிய பாதையாகவும், இயற்கை எழில் கொஞ்சும் பகுதியாகவும் விளங்குகிறது. இங்கு அமைக்கப்படும் ராட்சத காற்றாலைகள் மின்காந்த அதிர்வுகளை உருவாக்குவதுடன், அப்பகுதி மீனவர்களின் வாழ்வாதாரத்தையும், பறவைகளின் உயிருக்கும் அச்சுறுத்தலாக இருப்பதாகச் சுற்றுச்சூழல் ஆர்வலர்கள் நீண்டகாலமாக எச்சரித்து வருகின்றனர்.

மக்களின் நிலத்தையும், வளத்தையும் பாதுகாக்க 100 நாட்களாகப் பெய்து வரும் மழையிலும், சுட்டெரிக்கும் வெயிலிலும் மக்கள் மேற்கொண்டு வரும் இந்தச் சாத்வீகப் போராட்டம், தற்போது புதிய உத்வேகத்தைப் பெற்றுள்ளது. அரசு மௌனம் கலைந்து, மக்களின் கோரிக்கைகளுக்குச் செவிசாய்க்குமா என்பதைப் பொறுத்திருந்துதான் பார்க்க வேண்டும்.

@tamilviyugam