மல்வத்து ஓயா நீர்மட்டம் அதிகரிப்பு நானாட்டான் பிரதேச சபை தவிசாளரின் அவசர வேண்டுகோள்

மல்வத்து ஓயா நீர்மட்டம் அதிகரிப்பு நானாட்டான் பிரதேச சபை தவிசாளரின் அவசர வேண்டுகோள்

மன்னார்: வவுனியா மற்றும் அனுராதபுரம் பகுதிகளில் பெய்து வரும் கடும் மழையினால் மல்வத்து ஓயாவின் (அருவியாறு) நீர்மட்டம் முன்னெப்போதும் இல்லாத வகையில் விரைவாக அதிகரித்து வருகின்றது. இதனையடுத்து, நானாட்டான் பிரதேசத்தின் கரையோரக் கிராம மக்கள் எந்நேரமும் பாதுகாப்பான இடங்களுக்கு இடம்பெயரத் தயாராக இருக்குமாறு அவசர எச்சரிக்கை விடுக்கப்பட்டுள்ளது.

நானாட்டான் பிரதேச சபையின் தவிசாளர் அ. அன்று ராஜன் இது தொடர்பாக விடுத்துள்ள விசேட அறிவிப்பின் முக்கிய விபரங்கள் பின்வருமாறு:

{தமிழ் வியூகம்,  மன்னார், செய்தியாளர்,}

மக்களைத் தேடி வரும் வெள்ள அபாயம்!

மல்வத்து ஓயாவின் நீர்மட்டம் அபாய எல்லையைத் தாண்டி வருவதால், அனர்த்த முகாமைத்துவ மத்திய நிலையம் விடுத்துள்ள அறிவுறுத்தல்களுக்கமைய பொதுமக்கள் செயற்படுமாறு கேட்டுக்கொள்ளப்பட்டுள்ளனர்.

• கரையோரக் கிராமங்கள்: ஆற்றின் கரையோரத்தில் வசிக்கும் மக்கள் தமது பெறுமதியான ஆவணங்கள் மற்றும் அத்தியாவசியப் பொருட்களுடன் மேட்டுநிலப் பகுதிகளுக்குச் செல்லத் தயாராக இருக்க வேண்டும்.

• தடை செய்யப்பட்ட பகுதிகள்: குஞ்சுக்குளம் பாதை தேக்கம், அணைக்கட்டு மற்றும் தொங்கு பாலம் ஆகிய பகுதிகளைப் பார்வையிடச் செல்வதைத் பொதுமக்கள் முற்றாகத் தவிர்க்க வேண்டும்.

திறக்கப்படும் வான் கதவுகள்

தற்போதைய தகவல்களின்படி, நாச்சியாதீவு மற்றும் பாவற்குளம் ஆகிய பிரதான குளங்களின் வான் கதவுகளைத் திறப்பதற்கான ஏற்பாடுகள் நடைபெற்று வருகின்றன. இக்குளங்களிலிருந்து வெளியேறும் உபரி நீர் அருவியாற்றில் இணைவதால், இன்னும் சில மணித்தியாலங்களில் நீர்மட்டம் மேலும் பல மடங்காக உயரக்கூடும் என அஞ்சப்படுகிறது.

மன்னார் யாழ்ப்பாணம் பிரதான வீதி சிப்பியாறு பகுதியில் விபத்து

அவசர உதவிக்குத் தொடர்பு கொள்ள வேண்டிய எண்கள்

அனர்த்த காலங்களில் உடனடி உதவிகளைப் பெறப் பின்வரும் அவசரத் தொலைபேசி இலக்கங்களைத் தொடர்பு கொள்ளுமாறு கேட்டுக்கொள்ளப்படுகிறீர்கள்:

சேவை	அவசர இலக்கம்
அனர்த்த முகாமைத்துவ நிலையம் (DMC)	117
பொலிஸ் அவசர சேவை	119
சுவசெரிய இலவச ஆம்புலன்ஸ்	1990
தீயணைப்புப் படை	110
இலங்கை மின்சாரச் சபை	1987
வானிலை ஆய்வு மையம்	011 269 4030
போக்குவரத்து அவசர இலக்கம்	1913

பொதுமக்கள் தத்தமது பகுதிக்குரிய கிராம அலுவலர் மற்றும் நானாட்டான் பிரதேச செயலக அதிகாரிகளின் அறிவுறுத்தல்களை உடனுக்குடன் பின்பற்றி, உயிர்ச் சேதங்கள் ஏற்படாத வண்ணம் பாதுகாப்பாக இருக்குமாறு தவிசாளர் கேட்டுக்கொண்டுள்ளார்.

@tamilviyugam