மன்னார் நீதி மன்றத்திற்கு முன் துப்பாக்கி சூடு பிரதான சந்தேக நபருக்கு 90 நாட்கள் சீ.ஐ.டி விசாரணை நீதிமன்றம் அனுமதி

மன்னார் நீதி மன்றத்திற்கு முன் துப்பாக்கி சூடு பிரதான சந்தேக நபருக்கு 90 நாட்கள் சீ.ஐ.டி விசாரணை நீதிமன்றம் அனுமதி

மன்னார்: கடந்த ஆண்டு மன்னார் நீதிமன்றத்திற்கு முன்பாக இடம்பெற்ற அதிர்ச்சியை ஏற்படுத்திய துப்பாக்கிச் சூட்டுச் சம்பவத்தின் பிரதான சந்தேக நபரை, 90 நாட்கள் தடுத்து வைத்து விசாரணை செய்யக் குற்றப்புலனாய்வுத் திணைக்களத்திற்கு (C.I.D) மன்னார் நீதிமன்றம் அனுமதி வழங்கியுள்ளது.

தமிழ் வியூகம், 

மன்னார், 

செய்தியாளர், 

இன்று வெள்ளிக்கிழமை (2) பலத்த பாதுகாப்புக்கு மத்தியில் இடம்பெற்ற இந்த நீதிமன்ற விசாரணையின் போது, சட்ட ரீதியான பல திருப்பங்கள் அரங்கேறின.

வழக்கின் பின்னணி மற்றும் கைது நடவடிக்கை

கடந்த ஆண்டு ஜனவரி 16 ஆம் திகதி மன்னார் நீதிமன்றத்திற்கு முன்னால் துப்பாக்கிச் சூடு நடத்தப்பட்டது. இச்சம்பவம் தொடர்பாக நீண்டகாலமாகத் தேடப்பட்டு வந்த பிரதான சந்தேக நபர், அண்மையில் மன்னார் பொலிஸாரினால் கைது செய்யப்பட்டார்.

முருங்கன் பொலிஸ் நிலையத்தில் இரண்டு நாட்கள் தடுத்து வைக்கப்பட்டிருந்த இவருக்கு, அடம்பன் பகுதியில் இடம்பெற்ற மற்றொரு துப்பாக்கிச் சூட்டுச் சம்பவத்திலும் தொடர்பு இருப்பதாகச் சந்தேகிக்கப்படுகிறது. இதன் காரணமாக, இவ்வழக்கு சி.ஐ.டி-யிடம் ஒப்படைக்கப்பட்டது.

மன்னார் யாழ்ப்பாணம் பிரதான வீதி சிப்பியாறு பகுதியில் விபத்து

நீதிமன்றில் நடந்த சட்டப் போராட்டம்

சட்டத்தரணி எஸ். டினேசன் இந்த வழக்கின் முன்னேற்றம் குறித்து ஊடகங்களுக்குக் கருத்துத் தெரிவிக்கையில்:

• விளக்கமறியல் உத்தரவு: பயங்கரவாதத் தடைச் சட்டத்தின் கீழ் கைது செய்யப்பட்ட சந்தேக நபரை 72 மணித்தியாலங்கள் கொழும்பில் விசாரணை செய்த சி.ஐ.டி-யினர், இன்று நீதிமன்றில் ஆஜர்படுத்தினர். மேலதிக விசாரணைக்காக 90 நாட்கள் தடுத்து வைக்க அனுமதி கோரினர். எனினும், பாதுகாப்பு அமைச்சின் அனுமதி உரிய நேரத்தில் கிடைக்காததால், நீதவான் முதலில் அவரை எதிர்வரும் 12 ஆம் திகதி வரை விளக்கமறியலில் வைக்க உத்தரவிட்டார்.

• ஜனாதிபதியின் அனுமதி: சிறிது நேரத்திலேயே, பாதுகாப்பு அமைச்சரான ஜனாதிபதியிடம் இருந்து 90 நாட்கள் தடுத்து வைத்து விசாரணை செய்வதற்கான உத்தியோகபூர்வ அனுமதி சி.ஐ.டி-க்குக் கிடைத்தது.

• இறுதித் தீர்ப்பு: இதன்பின்னர், சி.ஐ.டி-யினர் 'நகர்தல் பத்திரம்' (Motion) மூலம் வழக்கை மீண்டும் விசாரணைக்கு எடுத்துக் கொண்டனர். பாதுகாப்பு அமைச்சின் அனுமதியை மன்று ஏற்றுக் கொண்டதையடுத்து, சந்தேக நபரை 90 நாட்கள் சி.ஐ.டி காவலில் வைத்து விசாரணை செய்ய நீதிமன்றம் அனுமதி அளித்தது.

பரபரப்பான சூழல்

நீதிமன்ற வளாகத்தைச் சூழ இன்று பலத்த பாதுகாப்பு ஏற்பாடுகள் செய்யப்பட்டிருந்தன. முக்கிய குற்றவாளியிடம் மேற்கொள்ளப்படும் இந்த 90 நாள் விசாரணையின் மூலம், இந்தத் துப்பாக்கிச் சூட்டுச் சம்பவங்களின் பின்னணியில் உள்ள மர்மங்கள் மற்றும் ஏனைய நபர்கள் குறித்த தகவல்கள் வெளியாகும் என எதிர்பார்க்கப்படுகிறது.

@tamilviyugam